القصة ابتدت ببوست بين اتنين صحاب عادي في فضاء الفيسبوك، واحد بيقول على نفسه انه باتمان على الله كدة، قام واحد صاحبه رد عليه قاله انه كداب وانه هوا باتمان الحقيقي، قام واحد تالت داخل في الزيطة وقال انه هوا باتمان الحقيقي.
بدأت خناقة في الكومنتات، فا واحد قرر انه ينهي الخلاف ده بتعليق ذكي جدا، ان الموضوع ده مش هيتحل غير بطريقة واحدة، ان كل اللي شايف نفسه باتمان ينزل حلوان يوم ١٣ اغسطس الساعة ١١ بالليل واللي يفضل عايش يبقا هوا باتمان الحقيقي.
فا واحد عمل ايفينت سماه "معركة باتمان حلوان الحقيقي" عشان اللي رايح يوم ١٣ اغسطس يعمل going وييجي لابس بدلة باتمان وتبدأ المعركة المنتظرة، الموضوع كبر، الناس بدأت تكتر، جروب اتعمل بقا عليه الافات، المشاهير بدأوا يتكلموا، و"محمد هنيدي" نزل صورته بقناع باتمان وقال انه هوا باتمان الحقيقي، والقصة بيوسع.
فالموضوع بقا تريند، وكله عمال يقول انه باتمان الحقيقي، والناس عمالة تشير في بدل باتمان، والبنات عاملين ايفينت مسميينه الباتوومان الحقيقية وعايزين يشاركوا، وفيه ناس عايزة تلبس الجوكر وتنزل على باتمان الحقيقي، وداخلين على عركة غريبة واجواء محدش فاهم منها حاجة
تعليقات